آسٹریلیا کے خلاف پہلے ٹیسٹ میچ کے دوران قومی ٹیم کے کپتان اظہر علی اور ان کے پارٹنر شان مسعود نے 75 رنز کی شاندار شراکت قائم کر کے 40 سال پرانا ریکارڈ توڑ دیا۔
برسبین میں پاکستان اور آسٹریلیا کے درمیان کھیلے جا رہے دو ٹیسٹ میچوں کی سیریز کے پہلے ٹیسٹ میچ کے پہلے دن پاکستانی اوپنرز نے اپنی ٹیم کو 75 رنز کا شاندار آغاز فراہم کر کے یہ ریکارڈ قائم کیا۔
یہ برسبین میں کھیلے گئے ٹیسٹ میچ کی پہلی اننگز میں کسی بھی غیر ملکی اوپننگ جوڑی کی گزشتہ 40 سال کے دوران سب سے بڑی اوپننگ شراکت ہے۔
اس سے قبل یہ اعزاز نیوزی لینڈ کے سابق اوپنرز جون رائٹ اور بروس ایجگر کے پاس تھا جنہوں نے تقریباً 4 دہائیوں قبل 64 رنز کی شراکت قائم کی تھی۔
پاکستان اوپنرز کی شاندار کارکردگی سے فائدہ اٹھانے میں ناکام رہا اور 94 رنز پر آدھی ٹیم پویلین لوٹ چکی تھی۔
اس کے بعد اسد شفیق نے محمد رضوان اور یاسر شاہ کے ساتھ مل کر اچھی شراکت قائم کی اور پاکستان کو پہلی اننگز میں 240 رنز کے معقول مجموعے تک رسائی دلائی۔
