عراق میں مہنگائی اور بے روزگاری کے اضافے پر حکومت کے خلاف شروع ہونے والا پرتشدد احتجاج جاری ہے جہاں مزید 6 شہری جاں بحق ہوگئے جس کے بعد ایک ماہ کے دوران فورسز کی فائرنگ سے جاں بحق مظاہرین کی تعداد 200 سے تجاوز کرگئی ہے۔
خبرایجنسی اے ایف پی کی رپورٹ کے مطابق عراق کے دارالحکومت بغداد اور جنوبی شہر میں احتجاج کے دوران مختلف واقعات میں 6 افراد جان سے گئے۔
عراقی حکام کا کہنا تھا کہ گزشتہ ایک ماہ کے دوران عراق میں احتجاج کے دوران ہلاکتوں کی تعداد 200 سے تجاوز کرگئی ہے۔
مزید پڑھیں:عراق میں پھر مظاہرے، جھڑپوں میں 2 افراد ہلاک، متعدد زخمی
عراقی ہیومن رائٹس کمیشن کے نمائندے علی بیاتی کا کہنا تھا کہ بغداد میں تین شہری جاں بحق ہوئے اور دیگر تین افراد جنوبی شہر ناصریہ میں نشانہ بنے۔
پولیس کا کہنا تھا کہ ناصریہ میں مظاہرین مقامی عہدیدار کے گھر کو نذر آتش کررہے تھے اسی دوران فائرنگ سے جاں بحق ہوئے۔
اے پی کی رپورٹ کے مطابق سیکیورٹی اور میڈیکل حکام کا کہنا تھا کہ بغداد میں نشانہ بننے والے تینوں افراد آنسو گیس کے شیل لگنے جاں بحق ہوئے جبکہ ہزاروں مظاہرین غیرملکی سفارت خانوں کے قریب گرین زون تک پہنچ گئے تھے۔
میڈیکل حکام کے مطابق ناصریہ میں سیکیورٹی فورسز کی فائرنگ سے مزید تین افراد جاں بحق ہوئے جنہیں صوبائی عہدیدار کے دفتر پر حملے پر نشانہ بنایا گیا۔
عراق میں رواں ہفتے احتجاج کے دوران جاں بحق افراد کی تعداد 48 ہوگئی ہے جبکہ اکتوبر کے اوائل میں ہی 149 مظاہرین کو نشانہ بنایا گیا تھا۔
خیال رہے کہ عراق میں احتجاج میں مختصر وقفے کے بعد گزشتہ روز ایک مرتبہ پھر مظاہرے شروع ہوگئے تھے اور جمعےکو 2 افراد کی ہلاکت کی تصدیق کی گئی تھی اور متعدد افراد زخمی بھی ہوگئے تھے۔
یہ بھی پڑھیں:عراق میں حکومت مخالف مظاہروں میں شدت، 93 ہلاکتوں کی تصدیق
قبل ازیں عراق میں حکومت کی ناقص پالیسیوں، مہنگائی اور بے روزگاری کے خلاف یکم اکتوبر کو شدید احتجاج شروع ہوا تھا جو دیکھتے ہی دیکھتے شدت اختیار کر گیا تھا۔
ایک سال قبل حکومت سنبھالنے والے وزیر اعظم عادل المہدی کو مختصر عرصے میں ہی عوام کی جانب سے شدید احتجاج کا سامنا ہے اور انہیں عوامی احتجاج کو روکنا مشکل تر ہو چکا ہے، حالانکہ انہیں اصلاحات کی یقین دہانی پر انہیں متفقہ طور پر وزیر اعظم بنایا گیا تھا۔
ایک سال قبل حکومت سنبھالنے والے وزیر اعظم عادل المہدی کو مختصر عرصے میں ہی عوام کی جانب سے شدید احتجاج کا سامنا ہے اور انہیں سنبھالنا مشکل تر ہو چکا ہے، حالانکہ انہیں اصلاحات کی یقین دہانی پر متفقہ طور پر وزیر اعظم مقرر کیا گیا تھا۔
