اسلام آباد کی انسداد دہشت گردی عدالت (اے ٹی سی) نے پاکستان تحریک انصاف (پی ٹی آئی) دھرنے کے دوران پاکستان ٹیلی ویژن اور پارلیمنٹ حملے کیس میں وزیراعظم عمران خان کی بریت سے متعلق درخواست پر فیصلہ محفوظ کرلیا۔
اے ٹی سی کے جج راجہ جواید عباس نے کیس کی سماعت کی اور وکیل بابر اعوان نے وزیر اعظم عمران خان کی بریت کا درخواست جمع کرائی تھی۔
مزیدپڑھیں: عمران خان نے انسداد دہشت گردی عدالت کے دائرہ کار کو چیلنج کردیا
حکومتی وکیل چوہدری شفقت نے بریت سے متعلق درخواست پر کوئی اعتراض نہیں کیا۔
چوہدری شفقت نے کہا کہ ’مذکورہ کیس میں عمران خان کی بریت پر کوئی اعتراض نہیں ہے‘۔
انہوں نے کہا کہ کیس سیاسی بنیاد پر بنایا گیا اور اس سے کچھ حاصل نہیں ہوگا بلکہ عدالت کا وقت ضائع ہوگیا۔
پولیس نے 2014 کے دھرنے کے دوران تشدد کو بھڑکانے پر پی ٹی آئی کے سربراہ عمران خان اور پارٹی کے رہنماؤں سمیت ڈاکٹر عارف علوی، اسد عمر، شاہ محمود قریشی، شفقت محمود اور راجہ خرم نواز کے خلاف انسداد دہشت گردی ایکٹ کی درخواست کی تھی۔
استغاثہ کے مطابق 3 افراد ہلاک اور 26 دیگر زخمی ہوئے جبکہ 60 افراد کو گرفتار کیا گیا تھا۔
یہ بھی پڑھیں: پاکستان،ایران کا انسداد دہشت گردی کیلئے قریبی انٹیلی جنس تعاون پر اتفاق
استغاثہ نے اپنے کیس کو قائم کرنے کے لیے 65 فوٹوز، لاٹھی، کٹر اور دیگر اشیا کو ثبوت کے طور پر عدالت میں پیش کیا تھا۔
استغاثہ نے کہا تھا کہ احتجاج پرامن نہیں تھا اور پی ٹی آئی رہنماؤں نے تین سال بعد ضمانت طلب کی۔
کیس میں فریقین کے دلائل سننے کے بعد عدالت نے وزیر اعظم عمران کی بریت کے لیے درخواست پر فیصلہ محفوظ کرلیا۔
انسداد دہشت گردی کی عدالت 5 سمبر کو محفوظ شدہ فیصلہ سنائے گی۔
واضح رہے کہ 2014 میں اسلام آباد میں پاکستان تحریک انصاف (پی ٹی آئی) اور پاکستان عوامی تحریک (پی اے ٹی) کے دھرنے کے دوران مشتعل افراد نے یکم ستمبر کو پی ٹی وی ہیڈ کوارٹرز پر حملہ کردیا تھا، جس کی وجہ سے پی ٹی وی نیوز اور پی ٹی وی ورلڈ کی نشریات کچھ دیر کے لیے معطل ہوگئی تھیں۔
حملے میں ملوث ہونے کے الزام میں تقریباً 70 افراد کے خلاف تھانہ سیکریٹریٹ میں پارلیمنٹ ہاؤس، پی ٹی وی اور سرکاری املاک پر حملوں اور کار سرکار میں مداخلت کے الزام کے تحت انسداد دہشت گردی سمیت دیگر دفعات کے تحت مقدمہ درج کیا گیا تھا۔
واضح رہے کہ عمران خان اور ڈاکٹر طاہر القادری پر اسلام آباد کے ریڈ زون میں توڑ پھوڑ اور سرکاری ٹی وی پاکستان ٹیلی ویژن (پی ٹی وی) پر حملے سیمت سینئر سپرنٹنڈنٹ پولیس (ایس ایس پی) اسلام آباد عصمت اللہ جونیجو کو زخمی کرنے کا الزام ہے۔
پی ٹی وی اور پارلیمنٹ حملہ کیس میں عمران خان اور ڈاکٹر طاہر القادری کے وارنٹ گرفتاری بھی جاری کیے گئے تھے۔
یہ بھی پڑھیں: اسلام آباد دھرنا: عمران خان کا وزیراعظم کے استعفے کا مطالبہ
بعد ازاں انسداد دہشت گردی عدالت نے مسلسل پیش نہ ہونے کے باعث عمران خان اور ڈاکٹر طاہر القادری کے ورانٹ گرفتاری اور جائیداد ضبط کرنے کے احکامات جاری کیے گئے تھے۔
خیال رہے کہ 14 نومبر 2017 کو انسداد دہشت گردی کی عدالت نے پاکستان تحریک انصاف (پی ٹی آئی) کے چیئرمین عمران خان کی ایس ایس پی عصمت اللہ جونیجو تشدد کیس سمیت چار مقدمات میں ضمانت منظور کی تھی۔
یاد رہے کہ گزشتہ سماعت کے دوران اسلام آباد کی انسداد دہشت گردی عدالت نے عمران خان کو پی ٹی وی اور پارلیمنٹ حملہ کیس سمیت چار مقدمات میں شامل تفتیش ہونے کا حکم دیا تھا۔
