منڈی بہاؤالدین: چائلڈ پروٹیکشن یونٹ منڈی بہاؤالدین کا سنگ بنیاد رکھ دیا گیا۔ وزیراعلٰی پنجاب عثمان بزدار کی ہدایت پر سپیشل کوآرڈینیٹر وزیراعلٰی و چیئرپرسن چائلڈ پروٹیکشن بیورو سارہ احمد نے چائلڈ پروٹیکشن یونٹ منڈی بہاؤالدین کی عمارت کی تعمیر کا سنگ بنیاد رکھا۔ اس حوالے سے خصوصی تقریب کا انعقاد کیا گیا جس میں ایڈیشنل ڈپٹی کمشنر جنرل محمد شفیق، سپرنٹنڈنٹ جیل ٹیپو سلطان، ڈائریکٹر پروگرام، ڈائریکٹر ایڈمن چائلڈ پروٹیکشن بیورواور دیگر نے شرکت کی۔ تقریب کے شرکاء سے خطاب کرتے ہوئے چیئرپرسن چائلڈ پروٹیکشن بیورو سارہ احمد نے کہا کہ وزیراعلٰی پنجاب عثمان بزدار کی ہدایت کے مطابق منڈی بہاؤالدین میں چائلڈ پروٹیکشن یونٹ قائم کیا جارہا ہے جس کی عمارت ڈسٹرکٹ کمپلیکس منڈی بہاؤالدین میں تعمیر کی جائے گی۔ چائلڈ پروٹیکشن یونٹ منڈی بہاؤالدین میں بچوں کو رہائشی سہولیات فراہم کی جائیں گی اور ریفرل یونٹ کے طور پر کام کرے گا۔چائلڈ پروٹیکشن یونٹ منڈی بہاؤالدین کی عمارت تقریبا 31 ملین روپے کی لاگت سے 2 سال میں تعمیر ہوگی۔ انہوں نے کہا کہ وزیراعلٰی پنجاب عثمان بزدار کے ویژن کے مطابق منڈی بہاؤالدین سمیت پنجاب کے تمام اضلاع میں چائلڈ پروٹیکشن یونٹس قائم کئے جارہے ہیں۔ چائلڈ پروٹیکشن بیورو کا دائرہ کار بہت جلد پنجاب بھر کے تمام اضلاع میں پھیلایا جائے گا۔ سارہ احمد نے کہا کہ پنجاب کے اضلاع میں چائلڈ پروٹیکشن یونٹس قائم کرنے پر وزیراعلٰی پنجاب، چیف سیکرٹری پنجاب، ایڈیشنل چیف سیکرٹری ہوم ڈیپارٹمنٹ اور دیگر محکموں کے تعاون کے شکر گزار ہیں۔
